د هرات ښاروالۍ د پراختیايي بودجې څخه د څه باندې ۳ میلیونه افغانیو په لګښت د فاروقیه ګذر اړوند د ترانس کوڅې د اسفالټ او کانال جوړولو پروژه پرانیستل شوه.
د هرات ښار د دولسمې ناحیې اړوند د فاروقیه ګذر د ترانس کوڅې د اسفالټ او د دواړو غاړو د کانال جوړولو پروژې چارې، چې ۴۴۰ متره اوږدوالی او ۷ متره پلنوالی لري او ورسره ۳۶۰ متره کانال هم جوړېږي، د ښاروالۍ د پراختیايي بودجې څخه د ۳ میلیونه، ۳۴ زره او ۶۹۲ افغانیو په لګښت، د هرات ښاروال الحاج مولوي حمدالله نعماني له لوري، د دفتر، نظارت او ارزونې آمریتونو د آمرانو، د دولسمې ناحیې د مسئولینو، قومي مشرانو، د ګذر وکیلانو، د پراختیايي شوراګانو رئیسـانو او د اړوندو برخو د یو شمېر مسئولینو په حضور کې د «عمر صالح» ساختماني او سړک جوړونې شرکت له لوري په رسمي ډول پرانیستل او پیل شوه.
دغه پروژه د سړک د وضعیت د ښه والي، د ښاریانو د تګ راتګ د اسانتیا، د سطحي اوبو د غوره مدیریت او په دې سیمه کې د ښاري زیربناوو د وضعیت د لوړولو په موخه پلې کېږي.
په همدې حال کې، د سیمې یو شمېر اوسېدونکو د دې پروژې له پیل څخه هرکلی وکړ او دا یې د سړک او د ژوند د چاپېریال د ښه والي په برخه کې اغېزمن ګام وباله.
هغوی هیله څرګنده کړه چې د پروژې له بشپړېدو سره به د تګ راتګ او سطحي اوبو اړوند ستونزې هوارې او د دولسمې ناحیې اوسېدونکو ته به لا ډېرې اسانتیاوې برابرې شي.
له بلې خوا، د «عمر صالح» ساختماني او سړک جوړونې شرکت مسئولینو ډاډ ورکړ چې د پروژې چارې به د تخنیکي معیارونو او د قرارداد د شرایطو مطابق، په مطلوب کیفیت او ټاکلې موده کې بشپړې او ګټې اخیستنې ته وسپارل شي.
د یادونې وړ ده چې ټاکل شوې دغه پروژه د څلورو تقویمي میاشتو په موده کې بشپړه او ګټې اخیستنې ته وسپارل شي.
