د هرات ښاروال او مل پلاوي د ښار په بېلابېلو ناحیو کې د پراختیايي پروژو د چارو له بهیر څخه لیدنه او څارنه وکړه.
د هرات ښاروال الحاج مولوي حمدالله نعماني، د ښاروالۍ له یو شمېر مسئولینو او انجنیرانو سره یوځای، د هرات ښار په بېلابېلو ناحیو کې د پراختیايي پروژو د چارو له بهیر څخه لیدنه او څارنه وکړه.
دغه لیدنه د ۱۴۰۵ هـ.ش کال د سنبلې میاشتې په ۵مه، د یکشنبې ورځې په مازدیګر، د هرات ښاروالۍ د فني او مسلکي رئیس انجینر محمد ایوب سیفالجهاد، د دفتر آمر، د انجینري عمومي مدیر او د اړوندو برخو د یو شمېر څارونکو انجنیرانو په حضور کې ترسره شوه.
د یادې لیدنې په جریان کې، له تخت صفر څخه تر غیاثیه پوهنتون پورې د حلقوي سړک د اسفالټ د سترې پروژې، د تخت صفر په میدانچه کې د پهلوانۍ «کشتيګیرۍ» د میدان د جوړولو او د ښار د بېلابېلو ناحیو اړوند د انجیل ویالې د استنادي دېوال د جوړولو پروژو د چارو بهیر وکتل شو او څارنه یې ترسره شوه.
د هرات ښاروال د یادې لیدنې پر مهال قراردادي شرکتونو ته لارښوونه وکړه، چې پروژې د فني معیارونو له مخې او په ټاکلې موده کې په معیاري ډول بشپړې کړي او د چارو د پلي کېدو په بهیر کې له هر ډول ځنډ څخه مخنیوی وکړي.
له بلې خوا، د یادو پروژو قراردادي شرکتونو مسئولینو هم د ژمي موسم د نږدې کېدو په پام کې نیولو سره ژمنه وکړه، چې د چارو د پلي کېدو بهیر به چټک کړي او پروژې به په ټاکلې موده کې بشپړې کړي.
دا په داسې حال کې ده، چې د ښاروالۍ د اړوندو برخو مسئولین، له څارونکو انجنیرانو سره یوځای، هره ورځ د هرات ښار د ناحیو په کچه د پراختیايي پروژو د چارو له کیفیت او بهیر څخه په دوامدار ډول څارنه او ارزونه کوي، څو د پروژو چارې په معیاري او ستندرد ډول عملي شي.
