د هرات ښاروالۍ د پراختیایي بودیجې څخه د نږدې ۱۵ میلیونه افغانیو په لګښت د ترقی (ملکیار) پارک د سوېل لوېدیځې برخې د بیارغونې او احیا پروژې پرانیسته او د چارو پیل.
د هرات ښار د څلورمې ناحیې اړوند د موجوده جمنازیوم ترڅنګ، د ترقی (ملکیار) پارک د سوېل لوېدیځې برخې د احیا او بیارغونې پروژه، د ۱۴ میلیونه او ۹۹۳ زره او ۹۱۰ افغانیو په ټولیز لګښت، د هرات ښاروالۍ د پراختیایي بودیجې څخه، د هرات ښاروال الحاج مولوي حمدالله نعماني، د هرات د چاپېریال ساتنې رئیس مولوي عبدالعلي متقي، د ښاروالۍ د فني او مسلکي رئیس انجینر محمد ایوب سیفالجهاد، د ښاري پلانونو د ترتیب آمریت مسؤل، د ښاروالۍ د شنهساحو د عمومي مدیریت مسؤلینو او یو شمېر ښاریانو په حضور کې په رسمي ډول پرانیستل شوه او چارې یې پیل شوې.
د دې پروژې د پرانیستې په مراسمو کې د هرات ښاروالۍ مسؤلینو د ښاري پارکونو د احیا او بیارغونې پر اهمیت ټینګار وکړ او د یادې پروژې موخه یې د شنو ساحو پراختیا، د ښاریانو لپاره د تفریح او استراحت د مناسبو چاپېریالونو رامنځته کول او د ښار د ښکلا لوړول وبلل.
د مسؤلینو د معلوماتو له مخې، د پارک د احاطوي کټارې جوړول، د موجوده جمنازیوم دواړو خواوو ته د موټرونو تمځایونو جوړول، د ویالو او پلي لارو جوړول د انټرلاک خښتو په وسیله، د روښنايي سیسټم نصب او د پروژې د نورو اړوندو برخو پلي کول، د دې پروژې له مهمو کاري برخو څخه دي.
له بلې خوا، د «توسعه افغان» ساختماني او سړک جوړونې شرکت مسؤلینو ډاډ ورکړ، چې د دې پروژې ساختماني چارې به د تخنیکي مشخصاتو او ټاکل شویو معیارونو سره سم، د اړین کیفیت په رعایتولو او په ټاکلي وخت کې بشپړې کړي.
په همدې حال کې، د هرات یو شمېر ښاریانو هم د دې پروژې د پیل هرکلی کړی او د ترقی (ملکیار) پارک بیارغونه یې د ښاري چاپېریال د ښهوالي، د تفریحي امکاناتو د زیاتوالي او د کورنیو او ځوانانو لپاره د مناسب چاپېریال د برابرولو په برخه کې مهمه بللې ده. هغوی د ښار د پارکونو د پراختیا او زرغونتیا لپاره د مسؤلینو د لا زیاتې پاملرنې غوښتنه هم کړې ده.
د یادونې وړ ده، چې دغه پروژه به د شاوخوا څلورو میاشتو په موده کې بشپړه او ګټې اخیستنې ته وسپارل شي.
