د هرات ښاروالۍ د پراختیايي بودجې څخه د شاوخوا ۲.۵ میلیونه افغانیو په لګښت د هرات ښار د نهمې ناحیې اړوند د ملاسیان سړک څخه تر آب بردې پورې د سرپوښ لرونکي کانال د جوړولو پروژه پرانیستل او عملي چارې یې پیل شوې.
د هرات ښار د نهمې ناحیې اړوند د ملاسیان سړک څخه تر آب بردې پورې د ۵۱۰ متره په اوږدوالي د سرپوښ لرونکي کانال د جوړولو پروژه، چې د هرات ښاروالۍ د پراختیايي بودجې څخه د ۲ میلیونه، ۴۹۲ زره او ۹۹۹ افغانیو په ټولیز لګښت پلې کېږي، د هرات ښاروالۍ د تخنیکي او مسلکي رئیس، انجنیر محمد ایوب سیفالجهاد، له لوري د نهمې ناحیې د آمر ملا ګل احمد رحیمي، د څارنې او ارزونې آمریت وارسي کونکی، د سیمې د مشرانو، د ګذر وکیلانو، د پراختیايي شوراګانو د رئیسانو او د نهمې ناحیې د یو شمېر اوسېدونکو په حضور کې په رسمي ډول پرانیستل شوه او عملي چارې یې پیل شوې.
په همدې حال کې د «هري دلتا» ساختماني او سړک جوړونې شرکت مسؤلینو ژمنه وکړه چې یاده پروژه به د تخنیکي معیارونو، د قرارداد د شرایطو او ټاکل شوي مهالویش سره سم، په لوړ کیفیت بشپړه او ګټې اخیستنې ته وسپاري.
بل لور ته، د هرات ښار د نهمې ناحیې اوسېدونکو د دې پروژې د پیل له امله خپله خوښي څرګنده کړه او د پروژې پلي کېدل یې د اوبو د بندېدو ستونزو د هواري، د تګ راتګ د اسانتیا او د ښاري خدمتونو د ښه والي لپاره یو ارزښتناک ګام وباله. هغوی همدارنګه د هرات ښار د ابادۍ او پراختیا په موخه د ښاروالۍ له ټولو پروګرامونو څخه خپل هر اړخیز ملاتړ اعلان کړ.
د یادونې وړ ده چې ټاکل شوې دغه پروژه د څلورو تقویمي میاشتو په موده کې بشپړه او ګټې اخیستنې ته وسپارل شي.
