د هرات ښار د اتمې ناحیې اړوند د شاوخوا ۴ میلیونه افغانیو په لګښت له مستوفیت څخه تر باغ مراد څلورلارې پورې د عمومي سړک د ختیځ لین د غاړې د قیر اچونې پروژه بشپړه او ګټې اخیستنې ته و سپارل شوه.
د هرات ښار د اتمې ناحیې اړوند، له مستوفیت څخه تر باغ مراد څلورلارې پورې د عمومي سړک د ختیځ لین د غاړې د قیر اچونې پروژه، چې ۸۵۰ متره اوږدوالی او ۵ متره سور لري، د هرات ښاروالۍ د پراختیایي بودیجې څخه د شاوخوا ۴ میلیونه افغانیو په لګښت بشپړه شوه.
دغه پروژه د هرات ښاروالۍ د مرستیال محترم الحاج مولوي جلالالدین حقدوست له لوري، د اتمې ناحیې د آمر او اړوندو مسؤلینو، د سیمې د مشرانو، د ګذر وکیلانو، د پراختیایي شوراګانو د رئیسانو او یو شمېر سیمهییزو اوسېدونکو په ګډون په رسمي ډول پرانیستل او ګټې اخیستنې ته وسپارل شوه.
په همدې حال کې، د اتمې ناحیې یو شمېر اوسېدونکو د دې پروژې د ګټې اخیستنې هرکلی وکړ او دا یې د ترانسپورتي وضعیت د ښهوالي او د ښاري زیربناوو د پراختیا په برخه کې ارزښتناک ګام وباله. هغوی هیله څرګنده کړه، چې د دې پروژې په پلي کېدو سره به په یاد مسیر کې د تګ راتګ ستونزې راکمې او ښاري خدمتونو ته د ښاریانو د اسانه لاسرسي زمینه برابره شي.
له بلې خوا، د «عمر صالح» ساختماني او سړک جوړونې شرکت مسؤلینو ډاډ ورکړ، چې دغه پروژه د تخنیکي معیارونو سره سم، په مطلوب کیفیت او ټاکلې موده کې بشپړه شوې ده.
د یادونې وړ ده، چې د دې پروژې چارې د څه باندې یوې میاشتې په موده کې بشپړې او اوس ګټې اخیستنې ته سپارل شوې ده.
