د هرات ښاروالۍ له لوري د نیالګیو کښېنولو کمپاین رسما پیل شو.
د هرات ښاروالۍ له لوري د شیدايي مامورینو پارک کې نن ورځ د نیالګیو کښېنولو کمپاین رسما د هرات ښاروال ملا نعمت الله (حسن حاجي صاحب)، د ولایت مقام د دفتر رئیس مولوي محمد طیب نجات، د دولتي او خصوصي ادارو یو شمېر رئیسانو، د ښاروالۍ د ښاري حکومتولۍ، تخنیکي او مسلکي ریاست رئیسانو، د ښاروالۍ داخلي او پنځلس ګونو ناحیو آمرینو، د ګذرونو وکیلانو او انکشافي شوراګانو رئیسانو په شتون کې افتتاح او پیل شو.
د هرات ښاروال ملا نعمت الله (حسن حاجي صاحب) د دغه پروګرام د پیل په مراسمو کې څرګنده کړه، چې هرات ښاروالۍ په پام کې لري، ۲۸ اصله مختلف النوع غیرمثمره نیالګي د ښار په بیلابېلو ساحاتو کې کښېنوي.
د هرات ښاروال همدا راز د ټولو ښاریانو غوښتنه وکړه؛ ترڅو د زرغونو سیمو د پراختیا او ساتنې په برخه کې همکاري وکړي او د نیالګیو کښېنولو ستر پروګرام کې چې د روژې مبارکې میاشتې په لومړۍ ورځ ټاکل شوي په لار واچول شي، ګډون وکړي او خپل فعاله ونډه ادا کړي.
نوموړي تېنګار وکړ، چې د ښاروالۍ د اړوند برخو مسؤلان د زرغونو سیمو د پراختیا او ساتنې لپاره په بشپړې رېښتینولۍ او اخلاص هڅه کوي.
بلخوا؛ د هرات ښاروالۍ د متخصصانو شورا رئیس محمد رفیق شهیر د نیالګیو کښېنولو کمپاین څخه په هرکلي د هرات ښاروالۍ مشرتابه او ټولو ښاریانو غوښتنه وکړه؛ ترڅو د ښار د ښکلا او چاپېریالي نظم په موخه پاشتان اوبو بند ته څېرمه ساحاتو کې یو ډول نیالګي کښېنوي.
د غونډې په دوام د هرات ښاروالۍ د ښاري حکومتولۍ رئیس مولوي عبدالاحد خیرخواه، د اسلام د ستر پیغمبر حضرت محمد ص د احادیثو په رڼا کې د نیالګيو کښېنولو د ارزښت اواهمیت اړوند خبرې وکړي او د ښار د پنځلس ناحیو د ټولو ګذر وکیلانو او انکشافي شوراګانو رئیسانو وغوښتل؛ ترڅو د شنو فضاوو د توسعې او پراختیا په چاره کې د ښاروالۍ ادارې سره لازمه او هراړخیزه همکاري وکړي.
په ورته مهال کې، د هرات ښاریانو، د ګذر وکیلانو او انکشافي شوراګانو رئیسانو د نیالګیو کښېنولو کمپاین د پیل څخه په هرکلي د زرغونو سیمو د پراختیا او توسعې په برخه کې د ښاروالۍ ادارې څخه خپل ملاتړ څرګند کړ.
د ویلو ده، چې د هرات ښاروالۍ اداره په پام کې لري، چې ښار کې د زرغونو سیمو د پراختیا په موخه ۲۸ زرع مختلف النوع غیره مثمره لکه ناجو، سرو، ارغوان، بنوښ او زینتي ګلان د پاښتان بند شاوخوا ، د ښار بلوارونو او پارکونو کې کښېنوي.
