دیارلسمه ناحیه کې د ۵۰ میلیون افغانۍ په لګښت پر قارون رود د نوي پل د جوړولو پروژه افتتاح او اجرائیوي چارې يې پیل شوې.
د هرات ښاروالۍ د دیارلسمې ناحیې اړوند پر قارون رود باندې د نوي پل د جوړولو پروژې کار د ۱۱۱ متر په اوږدوالي او ۱۶،۵ متر عرض سره د هرات ښاروالۍ پرمختیايي بودیجې څخه د پنځوس میلیون افغانۍ په لګښت رسما افتتاح او عملي چارې يې د قراردادي شرکت له لوري پیل شوې.
د دغې پروژې د پرانیستلو په مراسمو کې د هرات ښاروال ملا نعمت الله (حسن حاجي صاحب)، د ولایت مقام د دفتر رئیس مولوي محمد طیب نجات، د تخنیکي او مسلکي او د ښاري حکومتولۍ ریاستونو رئیسانو، د دیارلسمې ناحيې آمر، د ګذرونو وکیلانو، د انکشافي شوراګانو رئیسانو، او د دغې ادارې د اړوند برخو مسؤلانو په شتون کې پرانیستل شوه.
دغه پروژه د کهن کاران او بنیاد تابش ساختماني او سړک رغولو شرکتونو له لوري د ۹ تقویمي میاشتو په ترڅ کې به بشپړ شي.
د هرات ښاروال ملا نعمت الله (حسن حاجي صاحب) د دغې پروژې د پرانیستلو په مراسمو کې د پروژې د کار د پیل څخه د خوښي څرګندولو ترڅنګ ټېنګار وکړ، چې د هرات ښاروالۍ اداره ښاري انکشاف او بنستېزو پروژو عملي کولو لپاره ځانګړي پاملرنه لري او د قراردادي شرکتونو يې غوښتنه وکړه، چې چارې يې په معیاري او په خپل ټاکلې مهال بشپړکړي.
بلخوا، د قراردادي شرکتونو مسؤلانو ډاډ څرګند کړ، چې د پروژې چارې به د قرارداد د موادو سره سم په خپل ټاکل معیار سره بشپړوي.
په ورته مهال کې د دیارلسمې ناحیې اوسیدونکو د یادې پروژې د کار د پیل څخه خوشحاله دي او وايي، چې د دغه پل په جوړیدو سره به يې ستونزې د ترافیکي ګڼه ګوڼې، تګ راتګ او حمل و نقل په برخو کې هوارې شي.
