د هرات ښاروالۍ په ورځني ډول ۸۰۰ متر مکعب خځلې او کثافات د ښار د بیلابېلو سیمو څخه راټول او له ښاره بهر لیږدوي.
د هرات ښاروالۍ د تنظیف برخې هڅانده او زیارکښه کارکوونکي شپه او ورځ د ښار بېلابېلو ناحیو کې د عمومي کانالونو او لښتیو پاکولو، د خځلو او کثافاتو راټولولو او انتقال او د واټونو او پلي لارو د جارو کولو باندې بوخت دي، چې دغه چارې په دوو شیفتو شپه او ورځ کې ترسره کوي.
د هرات ښاروالۍ د تنظیف څانګه د ښار پر پاکوالي د ټېنګار سربېره له ټولو ښاریانو غوښتنه کوي، ترڅو د ښار د پاکۍ په برخه کې همکاري وکړي او خځلي او کثافات په ټاکل شوو ځایونو کې وغورځوي.
په ورته مهال کې د هرات ښاریان د ښاروالۍ ادارې د تنظیف برخې کارکوونکو له زیار او بې وقفې فعالیتونو له امله قدرداني کوي او د ښاري تنظیف د اصولو د رعایت سربېره د ټولو تنظیفي برنامو ملاتړ څرګندوي.
دا په داسې حال کې ده، چې د هرات ښاروالۍ د تنظیف برخې مسؤلان وايي، چې ورځني ډول ۸۰۰ مترمکعب خځلې او کثافات د ښار د بیلابیلو سیمو راټولوي او بهر ته يې انتقالوي.
د دوی په وینا، د ښار دوامداره پاکوالی د خلکو د همکارۍ پرته شوني نه ده او د هرات ښاریانو غواړي، چې د ښار تنظیفي اصول رعایت کړي، ترڅو پاک، سالم، منظم او ښکلی ښار ولرو.
