د هرات ښاروالۍ د ریاستونو او د پنځلسګونو ښاري ناحیو د آمریتونو ترمنځ د داخلي فوټسال سیالیو د پایلوبه ترسره شول.
د ښاروالیو چارو د عمومي انسجام ریاست د لارښوونې له مخې،چې په ښاروالیو کې د ورزشي فعالیتونو د ترسره کولو او د ورزشکارانو د ملاتړ په اړه شوې وه، د هرات ښاروالۍ د فرهنګي او ټولنیزو چارو آمریت له لوري د ښاروالۍ د تنظیف عمومي مدیریت او د عوایدو الف آمریت ترمنځ د فوټسال د پایلوبې سیالي ترسره شوه.
د دغو سیالیو دا پړاو، چې د هرات ولایت د بدني روزنې ریاست په همغږۍ د میرویس صادق په ورزشي جمنازیوم کې ترسره شوی و، د ښاروالۍ د تنظیف عمومي مدیریت د فوټسال لوبډلې په لومړي مقام ګټلو سره پای ته ورسېد. د عوایدو آمریت «الف» لوبډلې دویم او د معلوماتي ټکنالوژۍ آمریت فوټسال لوبډلې درېیم مقام خپل کړ.
د دغو سیالیو د پای ته رسېدو په مناسبت په جوړې شوې غونډه کې، چې د ښاروالۍ د ادارې د رئیسانو، آمرینو او کارکوونکو په ګډون ترسره شوه، د هرات ښاروالۍ د ښاري حکومتولۍ رئیس مولوي عبدالاحد خیرخواه د دې سیالیو د ترسره کولو په برخه کې د فرهنګي او ټولنیزو چارو آمریت له هڅو څخه په قدردانۍ سره، ورزش د ځوانانو د روغتیا او سالمتیا لامل وباله او د دولتي ادارو ترمنځ د فوټسال سیالیو، او ورپسې د هرات ښاروالۍ د منتخبې لوبډلې او د ولسوالیو له ښاروالیو سره د فوټسال سیالیو د ترسره کېدو خبر ورکړ.
په همدې حال کې، د هرات ښاروالۍ د فرهنګي او ټولنیزو چارو آمر حاجي غلام حضرت امیني وویل، چې سپېڅلی دین اسلام له نشهيي توکو او نشهکوونکو څخه د ډډې کولو ترڅنګ، د ټولنې ټولو قشرونو، په ځانګړي ډول ځوانانو، ته د ورزش او سالمې روغتیا سپارښتنه وکړه.
د دې پروګرام په پای کې، د دولتي مسئولینو له لوري د اتلولۍ جام، د دویم او درېیم مقام جامونه، مډالونه او ستاینلیکونه ورزشکارانو ته ووېشل شول.
