د هرات ښار د څلورمې ناحیې اړوند د امام بخاري ۱۹۶ او ۱۹۸ کوڅو د اسفالټ او کانکریټي کانال جوړولو پروژه د شاوخوا ۵.۵ میلیونه افغانیو په لګښت پیل شوه.
د سړکونو د وضعیت د ښه والي، د سطحي اوبو د غوره مدیریت، د ښاریانو د تګ راتګ د اسانتیا او د ښاري زیربناوو د پراختیا په موخه، د هرات ښار د څلورمې ناحیې اړوند د امام بخاري ۱۹۶ او ۱۹۸ کوڅو د اسفالټ او د سیخ لرونکي کانکریټي کانال جوړولو پروژې چارې، چې ټولټال ۵۱۰ متره اوږدوالی او ۰.۶ × ۰.۴ متره مقطع لري، د ښاروالۍ د پراختیايي بودجې څخه د ۵ میلیونه، ۳۴۶ زره او ۱۳۵ افغانیو په لګښت، د هرات ښاروال الحاج مولوي حمدالله نعماني له لوري، د څلورمې ناحیې، دفتر، نظارت او ارزونې آمریتونو د آمرانو، قومي مشرانو، د ګذر وکیلانو، د پراختیايي شوراګانو رئیسـانو او د اړوندو برخو د یو شمېر مسئولینو په حضور کې د «بنیاد برتر» ساختماني او سړک جوړونې شرکت له لوري په رسمي ډول پرانیستل او پیل شوه.
د «بنیاد برتر» ساختماني او سړک جوړونې شرکت مسئولینو ډاډ ورکړ چې دغه پروژه به د تخنیکي معیارونو او د قرارداد د شرایطو مطابق، په مطلوب کیفیت او ټاکلې موده کې بشپړه او ګټې اخیستنې ته وسپارل شي.
په همدې حال کې، د څلورمې ناحیې د امام بخاري کوڅو یو شمېر اوسېدونکو د دې پروژې له پیل څخه هرکلی وکړ او دا یې د سړکونو او ښاري خدمتونو د وضعیت د ښه والي په برخه کې اغېزمن اقدام وباله.
هغوی هیله څرګنده کړه چې د پروژې له بشپړېدو سره به د تګ راتګ او سطحي اوبو اړوند ستونزې راکمې او لا ډېرې اسانتیاوې به ورته برابرې شي.
د یادونې وړ ده چې ټاکل شوې د دې پروژې چارې د دریو تقویمي میاشتو په موده کې بشپړې او ګټې اخیستنې ته وسپارل شي.
