د څه باندې ۵ میلیون افغانۍ په لګښت د ښار په بیلابیلو ناحیو کې د بلوارونو د خړوبولو سیستم پروژه افتتاح او اجرائیوي چارې يې پیل شوې.
د هرات ښار مختلفو مسیرونو کې لکه د فرقې بیا تر کاریزک ، نمبریک څخه تر کارآباد او تخت صفر څخه بیا تر ګمرک پورې په نويو جوړ شوو بلوارونو کې د آبیارۍ سیستم او دري کړۍ ژور څاګانو د جوړولو پروژې کار د ۱۰۸۴۰ متر په اوږدوالي د هرات ښاروالۍ داخلي عوایدو څخه د نژدې ۵،۵ میلیون افغانۍ په لګښت افتتاح او عملي چارې يې د قراردادي شرکت له لوري پیل شوې.
دغه پروژه د هرات ښاروال ملا نعمت الله (حسن حاجي صاحب) له لوري او د هرات ښاروالۍ د تخنیکي او مسلکي ریاست رئیس انجینیر محمد ایوب سیف الجهاد، د سیمې مخورو او اوسیدونکو او د دغې ادارې د اړوند برخو مسؤلانو په شتون کې پرانیستل شوه او د فرید ترین ودانیز شرکت له لوري يې عملي او ودانیزې چارې پیل شوې.
د دغې پروژې د پرانیستلو پرمهال د هرات ښاروالۍ ووی ، چې د ښار په بلوارونو کې د دغه سیستم په رامنځته کېدو سره، د زرغونو سیمو د خړوبولو په برخه کې به ستونزې هوارې شي او د شنو فضاوو د توسعې لپاره به زمینې نورې هم برابرې شي.
د هرات ښاروال، له ټولو ښاریانو غوښتنه کړه، چې د زرغونو سیمو د ساتنې، مراقبت او پراختیا په چاره کې د دغې ادارې سره همکاري وکړي.
بلخوا، د قراردادي شرکت مسؤل وايي، چې دغه پروژه به د پلان سره سم په لوړ کیفیت او ټاکلې معیاد بشپړوي.
د ویلو ده، ټاکل شوې دغه پروژه د ۳ تقویمي میاشتو په ترڅ کې بشپړ او ګټې اخیستنې ته ورسول شي.
