د هرات ښاروالۍ د پراختیایي بودیجې څخه د شاوخوا ۴.۷ میلیونه افغانیو په لګښت د مارکېټونو د تنظیم آمریت د دوه پوړیز اداري ودانۍ جوړولو پروژه پرانیسته او کار یې پیل شو.
د هرات ښار د اتمې ناحیې اړوند د تخت صفر میدانچې په ساحه کې د مارکېټونو د تنظیم آمریت د دوه پوړیزې اداري ودانۍ جوړولو پروژه، د هرات ښاروالۍ د پراختیایي بودیجې څخه د شاوخوا ۴.۷ میلیونه افغانیو په لګښت، د هرات ښاروال الحاج مولوي حمدالله نعماني له لوري، د ښاروالۍ د فني او مسلکي رئیس انجینر محمد ایوب سیفالجهاد، د څارنې او ارزونې او اتمې ناحیې د آمرانو، د انجینرۍ عمومي مدیر، سیمهییزو مشرانو، د ګذر وکیلانو او یو شمېر اړوندو مسؤلینو په حضور کې په رسمي ډول پرانیستل شوه او عملي چارې یې پیل شوې.
د هرات ښاروالۍ مسؤلینو د دې پروژې د اهمیت په اړه وویل، چې د مناسب اداري چاپېریال رامنځته کول د مارکېټونو د تنظیم او مدیریت د بهیر د ښهوالي، د ښاروالۍ د عوایدو د سرچینو د زیاتوالي او د دې برخې مراجعینو او ښاریانو ته د لا ډېرو اسانتیاوو د برابرولو په برخه کې مهم دي.
له بلې خوا، په سیمه کې کارکوونکو هم د دې پروژې پیل د کار او دندې د فرصتونو د رامنځته کېدو لپاره یو ښه فرصت بللی او په ښار کې یې د پراختیایي پروژو د پلي کېدو له امله خوښي څرګنده کړې ده.
په همدې حال کې، د سیمې اوسېدونکو د دې پروژې د پیل هرکلی کړی او د دا ډول پروژو پلي کېدل یې د ښاري زیربناوو د پراختیا او د خدمتونو د وړاندې کولو د بهیر د ښهوالي لپاره اغېزمن بللي او د عمراني پروژو د دوام غوښتنه یې کړې ده.
د یادونې وړ ده، چې ټاکل شوې دغه پروژه د «انکشاف غرب» ساختماني شرکت له لوري د شاوخوا شپږو تقویمي میاشتو په موده کې بشپړه او ګټې اخیستنې ته وسپارل شي.
